Ҳамдиёрони азиз!
Агар таърихи Истиқлолияти давлатии Тоҷикистон чаҳоряк аср бошад, пас умри миллат ва таърихи давлатдории он ҳазорсолаҳост. Бузургтарин ва гаронарзиштарин падидаи таърихӣ дар радифи дигар ҷумҳуриҳои Шӯравӣ ба мардуми тоҷик насиб гардидани Истиқлолияти комили давлатӣ ба шумор меравад. Вале дар масири таърих дар рӯзҳои аввалини соҳибистиқлол гардиданаш бо дасисаю иғвои неруҳои ҷудоихоҳи берунию дохилӣ Ҷумҳурии Тоҷикистон ба ҷанги таҳмилии шаҳрвандӣ гирифтор шуд, ки паёмаду фалокат ва даҳшату фоҷеаҳои баамаломадаи он саҳифаҳои сангинтарину сахтарини сабақи таърих боқи хоҳанд монд.
Истиқлолият рамзи соҳибдавлатӣ ва ватандории миллати сарбаланду мутамаддини тоҷик аст, ки номаи тақдирашро бо дасти хеш навишта, роҳу равиши хоса ва мақому мавқеи муносибро дар ҷомеаи ҷаҳонӣ пайдо намуд ва набзи давлату миллати моро бо набзи сайёра ҳамсадо сохт.
Дар саҳифаҳои таърихи инсоният аз миёни давлатҳо ва халқу миллатҳои гуногун шахсиятҳои дурандеш ва фарҳангсолоре ба сари қудрат омаданд, ки сиёсат ва давлатдории онҳо бар пояи арзишҳои олии башарӣ орзуву омол ва ормонҳои миллии мардум устувор аст.
Имрӯзҳо Ҷумҳурии Тоҷикистон зери роҳбарӣ ва сиёсати оқилонаву хирадмандонаи беҳтарин чеҳраи сиёсии таърихи давлатдории навини тоҷик Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба яке аз кишварҳои рушдёфтаву тарақикардаи минтақа ва ҷаҳон табдил гардида, дар арсаи байналмилалӣ ҳамчун кишвари пешрафта нуфузу эътибори хоса пайдо намудааст.
Мардуми кишвар бо дастгирӣ аз сиёсати инсондӯстонаву фарҳангпарваронаи Пешвои маҳбубу муаззами миллат, муҳтарам Эмомалӣ Раҳмон имрӯз имконият доранд ва муҳимтар аз ҳама метавонанд сарбаландона ҷашну идҳои милливу давлатӣ ва санаҳои муҳими таърихиро бо шукуҳу шаҳомат таҷлил намоянд.
Ҳамдиёрони азиз!
Санаи 29 августи соли 1930 барои мардуми ноҳияи Панҷ яке аз санаҳои муҳими таърихӣ ба ҳисоб рафта, дар таърихи мардуми ин ноҳия ҳамчун санаи таърихӣ сабт гардидааст. Ноҳияи Панҷ санаи 29 августи соли 1930 таъсис ёфта, бо ноҳияњои Ҷайҳун, Ҷалолиддини Балхӣ, Фархор ва дар қисмати ҷануб бошад бо Ҷумҳурии исломии Афғонистон дар масофаи 56киллометр ҳамсарҳад мебошад. Ноҳияи Панҷ соли 1931 Саройкамар, солҳои 1931-1936 Бауманобод ва солҳои 1936-1963 Кировобод ном дошт.
Ноҳия аз 6 ҷамоат; Нури Ваҳдат, ба номи Сайфутдинов Кабут, Озодагон, шаҳраки Панҷ, Меҳвар ва Намуна иборат буда, имрӯз шумораи аҳолии ноҳия ба 133 ҳазору 700 нафар баробар аст. Маркази маъмурии ноҳия ҷамоати шаҳраки Панҷ мебошад.
Сатҳи ҳудуди ноҳия ноҳамвор буда, аз Шимолу Шарқ ба Ҷанубу Ғарб аз 1600 метр то 300 метр паст мебошад. Қисми шимолии ноҳияро нишебии қаторкуҳи Тераклитоғ, шимоли шарқиашро нишебии қаторкуҳи Қаротоғ ва ҷануби ғарбиашро бошад ҳамвории соҳили рости дарёи Панҷ ташкил медиҳад. Дар қисмати ҷанубии ноҳия сарҳади давлатии Тоҷикистонро аз Ҷумҳурии исломии Афғонистон дарёи Панҷ ҷудо менамояд.
Соҳаи асосии хоҷагии ноҳия пахтакорӣ мебошад. Ҷамъи заминҳои ноҳия 88 ҳазору 67 гектар мебошад, ки аз ин масоњат 15 ҳазору 385 гектарашро заминҳои обӣ ташкил медиҳанд. Ба ҳолати 1 июли соли 2025 кишоварзони ноҳия дар майдони 15 ҳазору 718 гектар кишти зироатҳои кишоварзӣ гузарониданд, ки нисбати соли гузашта 12 гектар зиёд буда, 6723 гектарашро пахта ташкил медиҳад.
Лозим ба ёдоварӣ аст, ки дар солҳои замони соҳибистиқлолӣ дар ҷамоатњои деҳоти ноњия чун дигар ноҳияҳои кишоварзии ҷумҳурӣ хоҷагиҳои деҳқонӣ самаранок фаъолият намуда истодаанд, ки имрўз шумораашон ба 5 ҳазору 698 адад баробар аст.
Ҳамдиёрони азиз!
Дар асоси манбаъҳои бадастомадаи маъмул соли 1927 агроном ва селексиомери рус Т.Артёмов нахустин маротиба дар заминҳои минтақаи “Ҳалқаёр”-и ҷамоати деҳоти Нури Ваҳдат 27 дона тухми пахтаи баландсифати Мисриро барои таҷриба кошта, ба парвариши ин навъи зироат мувофиқ будани мавзеи мазкурро аз назари илмӣ собит намуд. Ҳамзамон дар таърихи ноҳия аввалин маротиба як нафар деҳқони муҳоҷир бо номи Салим Наимов соли 1930 трактори Шўравии тамғаи ХТЗ “Унверсал”-ро аз вилояти Намангони Ҷумҳурии Ўзбекистон ба ноҳияи Панҷ овардааст.
Ҳамдиёрони арҷманд!
Имрўзҳо дар ноҳия соҳаҳои маориф, тандурустӣ, фарҳанг ва зифзи иҷтимоии аҳолӣ фаъолият намудани истода, дар баланд бардоштани сатҳи маънавиёти сокинони ноҳия саҳми худро гузошта истодаанд.
Айни замон дар ноҳия 53 муассисаи таълимӣ фаъолият намуда истодаанд, ки дар онҳо 30 ҳазору 798 нафар хонандагон ба таълиму тарбия машғул буда, ба ин шумора 1946 нафар омўзгорон дарс меомўзанд.
Дар соҳаи тандурустии ноҳияи низ 938 нафар табибону духтурон ба аҳолии ноҳия хизмати тиббӣ расонида истодаанд. Имрўз дар ноҳия 1 Беморхонаи марказӣ, 4 Беморхонаи рақамӣ дар ҷамоатҳои деҳот, 1 маркази саломатӣ, 34 бунгоҳҳои тиббӣ, 1 Маркази мубориза бар зидди бемориҳои сил, Маркази пешгирии бемориҳои ВНМО ба сокинони ноҳия хизмати тиббӣ мерасонанд.
Бо дастгирӣ аз сиёсати фарҳангпарваронаи Пешвои миллат, муҳтарам Эмомалӣ Раҳмон соҳаи фарҳанги ноҳия низ сол аз сол рушд ёфта истодааст.
Имрўз дар ноҳия 34 муассисаи фарҳангӣ, аз ҷумла 5 хонаи фарҳангӣ, 8 клуб, 1 китобхонаи марказӣ, 1 китобхонаи бачагона, 17 китобхонаи деҳотӣ, 1 боғи фарҳангӣ-истироҳатӣ ва 1 мактаби санъати бачагона ба аҳолӣ хизмати фарҳангӣ расонида истодаанд.
Маврид ба зикр аст, ки имрўз дар доираи иҷрои Нақша-чорабиниҳои мақомоти иҷроияи ҳокимияти давлатии ноҳия бобати сазовор истиқбол гирифтани ҷашни 35-солагии Истиқлолияти давлатии Ҷумҳурии Тоҷикистон аз 232 иншооти банақшагирифташуда ба ҳолати 1 августи соли 2025 145 иншоотҳои таъиноташон гуногун мавриди истифодабарӣ қарор дода шудаанд, ки ба 62,5 фоизи нақша баробар мебошад.
Ҳамдиёрони азизу арҷманд!
Мардуми меҳнатдўсту шарифи ноҳия имрўз номи шахсиятҳои маъруфу шинохтаро, ки дар рушду ободӣ ва пешрафти ноҳия чӣ дар замони солҳои собиқ иттиҳоди Шўравӣ ва ҳам дар замони солҳои соҳибистиқлолӣ саҳми арзандаву босазои худро гузоштаанд, бо ифтихор ба забон гирифта, аз онҳо ба некӣ ёд мекунанд.
Марҳум Сафархўҷа Тоиров, марҳум Меҳрубон Ҳасанов, марҳум Аслам Сафаров вакили мардумӣ дар Шўрои Олии Ҷумҳурии Тоҷикистон, марҳум Кабут Сайфутдинов ду даъват вакили мардумӣ дар Шўрои Олии Ҷумҳурии Тоҷикистон, ҳамзамон собиқ раиси хоҷагии “Правда”, собиқ раиси хоҷагии “1-уми май” Болта Нидоев, айни замон нафақахўр ва собиқ раиси ҷамоати деҳоти Сармантой ҳозира Озодагон Зайтуна Қаландарова низ ҳоло нафақахўр аз зумраи он чеҳраҳое мебошанд, ки дар рушду нумўи соҳаҳои мухталифи ноҳия саҳми арзандаи худро гузошта, хотираи нек ва саҳмгузориву меҳнати онҳо ҳаргиз фаромўш нахоњад шуд.
Чӣ тавре дар боло зикр намудем имрўз ноҳияи Панҷ дар масоҳаи 56 киллометр бо Ҷумҳурии исломии Афғонистон ҳамсарҳад буда, дар оромии сокинони ноҳия ва сарҳади давлатӣ заҳмати шабонарўзӣ ва саҳми афсарону сарбозони Раёсати Қушунҳои Сарҳадии Кумитаи давлатии амнияти миллии Ҷумҳурии Тоҷикистон дар ноҳия бесобиқа мебошад.
Дар баробари ин имрўзҳо бо дарназардошти вазъияти ниҳоят мураккаб ва печидаи минтақа ва ҷаҳон, махсусан амалҳои экстремистиву террористӣ, пешгирии гаравидани шаҳрвандон махсусан ҷавонон ба ин созмону ҳаракатҳои иғвоангезу ҷудоихоҳ, коҳиш додани сафи ҷинояту ҷинояткорӣ ва аз байн бурдани таблиғу ташвиқи фарҳанги бегона ва таҳкими сулњҳу субот, оромӣ ва соҳибистиқлолии кишвар мақомотҳои ҳифзи ҳуҳуқ; прокуротураи ноҳия, суди ноҳия, шуъбаи дар ноҳияи Панҷи Раёсати Кумитаи давлатии амнияти миллии Ҷумҳурии Тоҷикистон дар вилояти Хатлон ва шуъбаи Вазорати корҳои дохилӣ дар ноҳия низ саҳми арзандаву босазои худро мунтазам гузошта истодаанд.
Ҳамдиёрони азизу гиромӣ!
Итминони комил аст, ки мардуми меҳнатдўсту шарифи ноҳияи Панҷ бо дастгирӣ аз сиёсати хирадмандонаву оқилона ва созандаву бунёдкоронаи Пешвои маҳбуби миллат, муҳтарам Эмомалӣ Рашмон бо мақсади амалӣ намудани ҳадафҳои стратегии кишвар, махсусан таъмини амнияти озуқаворӣ, ҳамзамон таҳкими сулҳу субот, соҳибистиқлолӣ ва сазовор истиқбол гирифтани ҷашни 35-умин солгарди Истиқлолияти давлатии Ҷумҳурии Тоҷикистон саҳми арзандаву босазои худро хоҳанд гузошт.
95-солагии “Рўзи таъсисёбии ноҳияи Панҷ” муборак
