Рафти иҷрои Консепсияи гузариш ба таҳсилоти рақамӣ
25 июни соли ҷорӣ иҷлосияи бисту чоруми Маҷлиси вакилони халқи ноҳияи Панҷ (даъвати шашум) баргузор гардид, ки дар он вакилони Маҷлиси вакилони халқи ноҳия, сарварони мақомоти ҳифзи ҳуқуқ, раисони ҷамоатҳо, роҳбарони муассисаю корхонаҳои ноҳиявӣ ва дигар фаъолон иштирок доштанд. Дар иҷлосия масъалаҳои зерин мавриди баррасӣ қарор гирифтанд.
1.Рафти иҷрои қарори раиси ноҳияи Панҷ аз 18 январи соли 2023, № 45 дар бораи қарори раиси вилояти Хатлон аз 9 ноябри соли 2022, № 333 оид ба қарори Ҳукумати Ҷумҳурии Тоҷикистон аз 31 августи соли 2022, № 439 «Дар бораи тасдиқи Нақша-чорабиниҳои мақомоти иҷроияи ҳокимияти давлатии вилояти Хатлон оид ба татбиқи Консепсияи гузариш ба таҳсилоти рақамӣ дар Ҷумҳурии Тоҷикистон барои давраи то соли 2042».
- Ҳисоботи сардори нозироти андози ноҳия оид ба иҷрои талаботҳои Кодекси андози Ҷумҳурии Тоҷикистон дар ноҳияи Панҷ.
- Дар бораи тасдиқи қарорҳои раиси ноҳия дар давраи иҷлосияҳои бисту сеюм то иҷлосияи бисту чоруми (даъвати шашум)-и Маҷлиси вакилони халқи ноҳияи Панҷ.
4.Масъалаҳои ҷорӣ.
Аз рӯи масъалаи аввали рӯзнома гузориши муовини раиси ноҳия П.Гадозода шунида шуд. Дар гузориш аз ҷумла қайд карда шуд, ки 30 майи соли равон Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони илм ва маорифи кишвар мулоқоти судманде доир намуданд. Ҳадаф аз ин мулоқот баррасии натиҷаҳои пештара ба даст овардашуда дар самти илм ва маориф ва ҳолати кунунии рушди илм, дурнамоӣ он баланд бардоштани сатҳу сифати омӯзиши илмҳои дақиқ, табиӣ ва риёзӣ, ташаккули тафаккули техникӣ, ривоҷи ихтироъкорӣ ва баланд бардоштани корӣ сифат ва самаранокии тарбияи мутахассисони илмӣ дар кишвар мебошад.
Тавре огоҳӣ дорем, Сарвари кишвар муҳтарам Эмомалӣ Раҳмон дар Паёми 28 декабри соли 2023 ироа намудаашон чунин қайд карда буданд: «Ҳукумат барои таъмин намудани пешрафти соҳаҳои илму маориф ҳамчун самти афзалиятнокӣ сиёсати иҷтимоӣ аз тамоми имкониятҳо истифода карда, ба рушди илмҳои техникию табиатшиносӣ аҳамияти аввалиндараҷа медиҳад ва доир ба баланд бардоштани сатҳу сифати таълим, ҷорӣ намудан ва васеъ гардонидани доираи истифодаи технологияҳои иттилоотию коммуникатсионӣ, аз ҷумла шабакаи интернет дар низоми таҳсилот, таълими самаранокии фаъолияти омӯзгорон ва такмили малакаи омӯзгории онҳо тамоми чораҳои заруриро амалӣ мегардонад».
Истифодаи технологияҳои муосир, аз ҷумла мултимедия, видеотасвирҳо, тахтаҳои электронӣ ва ғайра имконият медиҳанд, ки раванди дарс айёнӣ шуда, дараҷаи фаҳмо будани он афзояд. Хонандагон дар чунин шакли гузариши дарс ҳам мешунаванд, ҳам мебинанд ва ҳам дарк мекунанд, ки ин барои пешрафти фикрии онҳо натиҷа овар мешавад. Маҳз бо ҳамин мақсад Қарори раиси ноҳия дар бораи тасдиқи нақша-чорабиниҳо аз 20 банд иборат буда, тамоми масъалаҳои вобаста ба таҳсилоти рақамиро дар бар мегирад.
Бояд гуфт, ки шуъбаи маорифи ноҳия дар ин бобат Қарори шуъбаи маорифро қабул карда, Нақша– чорабиниҳои дар ин самт таҳия ва тасдиқшударо ба 51 муассисаи таҳсилотии умумӣ, литсей ва гимназия, 7 муассисаи таълимии томактабӣ дастрас намудааст. Айни замон дар муассисаҳои таҳсилоти умумии ноҳия 913 адад компютер, 113 адад принтер, 22 адад скайнер, 31 адад тахтаи электронӣ, 42 адад видеопроектор, зиёда 140 адад камераҳои назоратӣ мавриди истифода қарор доранд.
Омӯзгорони фанни технологияи иттилоотии муассисаҳои таҳсилоти умумӣ дар машғулиятҳои назариявӣ ва амалии худ бештар аз технологияи иттилоотии коммуникатсионӣ истифода мебаранд ва аксарияти хонандагон бо компютер кор карда метавонанд.
Технологияи иттилоотӣ айни замон дар муассисаҳои таълимии ноҳия бо методҳои маъмулии таълим имконият медиҳад, ки омӯзгорон маҳорати таҳқиқиву малакаи эҷодиро дар ниҳоди хонандагон бедор карда, муҳити солими психологиро таъмин созанд. Ҳамзамон омӯзиши технологияи иттилоотӣ майлу рағбат ва донишомӯзии хонандагонро бедор месозад. Лозим меояд, ки ба хонандагон ҳам дарсҳои амалӣ тавассути компютер ва ҳам забонҳои алгоритмӣ, яъне забонҳои барномасозию чуқур омӯзонем, то ки онҳо ҳам ҳалли масъаларо ба воситаи компютер анҷом дода тавонанд ва ҳам роҳҳои таҳиякунии барномаҳоро аз худ намоянд. Тахтаи электронӣ ҳам дар ин самт мусоидат менамояд.
Истифодаи технологияи иттилоотӣ ва коммуникатсионӣ, яъне компютер, камера, фиттаҳо, дастгоҳҳои видеоӣ ва шунавоӣ ҷараёни таълимро барои хонандагон ва омӯзгорон хеле фаъол мегардонад, вале имрӯз дар муассисаҳои таълимӣ тахтаҳои электронӣ камтар ҳаст.
Барои расидан ба мақсад кабинетҳои бо таҷҳизоти техникии муосир муҷаҳҳаз хеле зарур аст, вале то айни замон чунин кабинетҳо 51 адад ё 48% фоизи барномаро ташкил медиҳад. Ҷиҳати харидори намудани технологияи иттилоотӣ аз ҳисоби кумитаи падару модарон, соҳибкорони маҳаллӣ ва ашхоси саховатпеша 25 адад компютер, 2 адад тахтаи электронӣ, 2 адад проектор харидорӣ карда дастраси хонандагон гардонида шудааст.
Мақсад ва ҳадафи тадбиқи Консепсияи гузариш ба таҳсилоти рақамӣ дар Ҷумҳурии Тоҷикистон барои давраи то соли 2042 фароҳам овардани шароитҳои зарурӣ ба рушди соҳаи маориф, аз ҷумла гирифтани таҳсилоти бо- сифат дар асоси стандартҳои давлатии таҳсилот ба сатҳи давлатҳои тараққикардаи ҷаҳон наздик намудани низоми маъориф мебошад. Моро зарур аст, ки бо истифода аз тамоми имкониятҳо то соли 2042 дар ҳамаи муассисаҳои таълимӣ пурра ба таҳсилоти рақамӣ гузарем.
Сипас аз рӯи гузориш Сардори Раёсати молия А.Сафарзода, сармутахассиси шуъбаи маориф Д.Холов, мудири шуъбаи рушди иҷтимоӣ ва робита бо ҷомеа С.Комилов, раиси Ҷамоати деҳоти ба номи Сайфуддинов К. ва дигарон ба музокира баромаданд.
Вобаста ба масъалаи дуюми рӯзнома сардори Нозироти андоз Х.Файзуллозода баромад кард. Баъдан қарорҳои раиси ноҳия дар давраи иҷлосияҳои 23-юм то 24-уми (даъвати шашуми) Маҷлиси вакилони халқи ноҳия тасдиқ карда шуданд.
Дар иҷлосия намояндаи мақомоти иҷроияи ҳокимияти давлатии вилояти Хатлон Акрам Нурализода иштирок ва суханронӣ намуд. Раиси ноҳия Шоҳиён Зарифхуҷа Фақер кори иҷлосияро ҷамъбаст намуд ва намояндаи вилоятро бовар кунонид, ки масъулини соҳаҳо ва мардуми шарифи ноҳия камбуду нуқонҳои ҷойдоштаро оҷилан рафъ намуда, тамоми имкониятҳоро баҳри сазовор истиқбол гирифтани ҷашнҳои дарпешистода ва махсусан 35-умин солгарди истиқлолияти Ҷумҳурии Тоҷикистон чораандешӣ мекунанд.
Н.Фозилҷон, П.Нуров
