Тавре ба ҳамагон маълум аст, оила асоси ҷомеа, хурдтарин ячейкаи иттиҳоди одамон мебошад, ки аз падар модар бародару хоҳар, бобокалону модаркалон ва дигар аъзоён иборат аст. Барои рушди оила дар мамлакати мо ҳамеша ва пайваста ғамхорӣ карда мешавад. Маҳз ба ҳамин мақсад санадҳои дорои аҳамияти калони ҳуқуқӣ, аз ҷумла Қонун «Дар бораи оила», Кодекси оила дар Ҷумҳурии Тоҷикистон ва дигар ҳуҷҷатҳо қабул ва тасдиқ карда шудаанд. Тибқи ин ҳуҷҷатҳо оила ҳуқуқу вазифаҳои мушаххаси худро дорад ва дар асоси онҳо амал мекунад.
Дар замони соҳибистиқлолӣ ба хотири боз ҳам таҳким бахшидани нақшу мақоми оила Қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва «Дар бораи танзими анъана ва ҷашну маросим дар Ҷумҳурии Тоҷикистон» қабулу тасдиқ гардидаанд, ки ҳуқуқу вазифаҳои оиларо ҳамчун иттиҳоди аввалини одамон боз ҳам устувор гардондаанд.
Дар ҷумҳурии мо ҳамасола 15 май ҳамчун Рӯзи оила таҷлил карда мешавад. Ба ин муносибат бо ибтикори мақомоти иҷроияи ҳокимияти давлатии ноҳия, Бахши сабти асноди ҳолати шаҳрвандӣ, Бахши занон ва оила, Бахши фарҳанг ва дигар масъулин дар Боғи фарҳангию фароғатии ноҳия чорабинии махсуси идона доир карда шуд. Дар ин чорабини муовинони раиси ноҳия Паймона Гадозода ва Мизроб Раҷабзода, аз ҷамоатҳои шаҳраку деҳот оилаҳои намунавӣ, ҷавонон, занон, собиқадорони меҳнат ва дигар қишрҳои ҷомеа иштирок доштанд. Барои инъикоси ин чорабини намояндагони васоити ахбори оммаи ноҳияву вилоят низ иштирок доштанд.
Дар ҷамъомад муовини раиси ноҳия Паймона Гадозода ба сухан баромада, табрикоти раиси ноҳияро ба муносибати рӯзи оила ироа намуд. Дар табрикот, аз ҷумла ғамхориҳои давлату Ҳукумати Тоҷикистон, мақомоти иҷроияи ҳокимияти давлатии вилояти Хатлон ва ноҳия ҷиҳати рушди ҳамаҷонибаи оила, ҳуқуқу вазифаҳои он дар шароити истиқлолии Тоҷикистон, беҳтар шудани фаъолияти занон, баробарҳуқуқии гендерӣ, беҳтар намудани муносибатҳои оилавӣ, пешгирии вайроншавии оилаҳо, роҳ надодан ба хушунат ва зӯроварӣ дар оила, эҳтироми ҳуқуқҳои модару кудак ва дигар масоили мубрами рӯз хеле хуб баррасӣ шуданд.
Баъди гузориши муовини раис барои оилаҳои навбунёд ва навташкил аз ҷониби Бахши сабти асноди ҳолати шаҳрвандӣ дар вазъияти тантанавӣ шаҳодатномаҳои ақди никоҳ ва тӯҳфаҳои хотиравӣ тақдим карда шуд. Шаҳодатнома ва туҳфаҳоро мудири Бахши САҲШ Гулрухсор Давлатзода ба оилаҳои Наимов Суҳайлӣ ва Абдуллозода Суҳайло аз Ҷамоати деҳоти Меҳвар, Зайдуллозода Насрулло ва Саидзода Наҷафмо аз Ҷамоати деҳоти Сайфуддинов Кабут, Раймалиев Бобоқамбар ва Қурбонова Дилафруз аз Ҷамоати деҳоти Намуна, Фақеров Фақир ва Холиқзода Сарвиноз аз Ҷамоати деҳоти Озодагон, Шодмонов Холмуҳаммад ва Алимова Мадина аз Ҷамоати деҳоти Нури Ваҳдат тақдим кард.
Ҳамзамон, мудири Бахши занон ва оилаи мақомоти иҷроияи ҳокимияти давлатии ноҳия Намозова Гулбаҳор ба оилаҳои намунавӣ Ҳаётов Қиёмиддин ва Наботова Аслвӣ аз Ҷамоати шаҳраки Панҷ, Раймалиев Бобоқамбар ва Қурбонова Дилафруз аз Ҷамоати деҳоти Намуна, Шафиев Муқим ва Салимова Назокат , Нуров Тошмат аз Ҷамоати деҳоти Меҳвар, Одинаев Диловар ва Самиева Нигина аз Ҷамоати деҳоти Нури Ваҳдат, Давлатов Ҷӯрахон ва Наимова Сокина аз Ҷамоати деҳоти ба номи Сайфуддинов Кабуд, Сулаймонова Сабригул ва Фозилов Фозил аз Ҷамоати деҳоти Озодагон тӯҳфаҳои хотиравӣ ва сипосномаву ифтихорнамаҳо тақдим намуд.
Сипас барои иштирокчиёни Рӯзи оила аз ҷониби ҳунармандони Қасри фарҳанги ноҳия барномаи рангини консерти намоиш дода шуд. Иштирокчиён дар партави
оҳангҳои шӯху дилнавози ҳунарпешагон рақсу бозӣ карданд. Рӯзи оиларо маҳсули дасти ҳунармандон ва
дастовардҳои гуногуни оилаҳои пешқадам шукӯҳу шаҳомати хоса бахшиданд.
Рӯзи оила дар ноҳия хеле таъсирбахшу хотирмон баргузор гардид.
П. Нуров
