Тибқи дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати баланд бардоштани эҳсоси меҳанпарастию инсонпарварӣ дар ҳама шаҳру ноҳияҳо гурӯҳҳои таблиғотӣ сафарбар карда шудаанд. 15 майи соли равон дар Кохи ҷасорати қисми ҳарбии 0306 -и Қӯшунҳои сарҳадии КДАМ Тоҷикистон бо сарбозону афсарони қисмҳои низомии дар ноҳия мавқеъдошта гурӯҳи кории Кумитаи иҷроияи ҳаракати ҷамъияти ваҳдати миллӣ ва эҳёи Тоҷикистон мулоқоти судманде густурда шуд.
Пеш аз мулоқот сарбозону афсарон ва хонандагони Гимназияи давлатии ноҳия барои қабули меҳмонон омодагӣ гирифта, онҳоро бо гулдастаҳо ва қироати шеърҳои ватандӯстона истиқбол намудаанд. Сипас меҳмонон ба Кохи барҳавои ҷасорат, ки бо ибтикорӣ Пешвои миллат, ба истифода дода шуда буд, ворид гаштанд. Сарбозону афсарон ва дигар даъватшудагон меҳмонони олиқадрро гарму ҷӯшон ва бо чапакзаниҳои пурмавҷ пешвоз гирифтанд. Ба ҳайати меҳмонон раиси Комиҷроияи ҳаракати ҷамъиятии ваҳдати миллӣ ва эҳёи Тоҷикистон муҳтарам Рудобаи Мукаррам , раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулмаҳмадзода, сӯхангуи Маркази исломшиносии назди Президенти Ҷумҳурии Тоҷикистон Абдуллоҳи Қодирӣ, Генерал – майёори Қӯшунҳои сарҳадӣ, муовини Фармондеҳи ҚС КДАМ Тоҷикистон Назарзода Тӯрабек Камол, меҳмонони дигар А Амирбекзода, И Холов, инчунин Сардори Раёсати кор бо чавонон ва варзиши вилояти Хатлон, сохторҳои дигари вилоятӣ, аз ҷумла муовини раиси Шӯрои ҳаракати ҷамъиятии ваҳдати миллӣ ва эҳёи Тоҷикистон дар вилояти Хатлон Амиршоҳи Хатлонӣ шомил буда, намояндагони васоити ахбори оммаи ҷумҳуриявӣ, вилоятӣ ва ноҳиявӣ дар мулоқот иштирок доштанд.
Чорабиниро муовини Фармондеҳи ҚС КДАМ Тоҷикистон, генерал – майор муҳтарам Назарзода Тӯрабек Камол ҳусни оғоз бахшид. Суруди миллӣ аз ҷониби ҳамаи иштирокчиён бо маҳорати баланди касбӣ сароида шуд. Сипас сухани ифтитоҳӣ ба раиси ноҳияи Панҷ, узви Маҷлиси миллии Маҷлиси Олии Ҷумҳурии Тоҷикистон муҳтарам Шоҳиён Зарифхӯҷа Фақер дода шуд. Мавсуф, қабл аз ҳама, меҳмононро барои ташрифашон ба ноҳияи дурдасти Панҷ хайрамақдам гуфт ва дар бораи Шӯрои ҳаракати ҷамъиятии ваҳдати миллӣ ва эҳёи Тоҷикистон дар ноҳияи Панҷ, фаъолияти Шӯро ва ташкилотҳои ибтидоии он, саҳми ин ҳаракат дар таблиғу роҳандозии сиёсати оқилонаю хирадмандонаи Пешвои муаззами миллат муҳтарам Эмомалӣ Раҳмон муфассал сухан ронд.
Пасон раиси Комиҷроияи ҳаракати ҷамъияти ваҳдати миллӣ ва эхёи Тоҷикистон мухтарам Рудобаи Мукаррам ба сухан баромада, дар бораи саҳми арзишманду собитқадамонаи Президенти Ҷумҳурии Тоҷикистон муҳтарам Эмомалӣ Раҳмон дар ташкилу таҳкими ваҳдати миллӣ, баҳамории қувваҳои дарнабардбуда, сарҷамъ намудани гурезаҳои иҷборӣ, бароҳ мондани фаъолияти меҳнатии ҳамаи сохторҳою ниҳодҳо, сафарбар намудани оммаи васеи халқи Тоҷикистон ба меҳнати бунёдкорона ва дигар муваффақияту дастовардҳои замони истиқлолӣ, ки бевосита бо номи ин абармарди дунёи сиёсат зич алоқаманданд, андешарони кард. Мавсуф аҳли толорро барои ҳимояи ин дастоварду комёбиҳо ва марзу буми кишвари азизамон – Тоҷикистони биҳиштосо даъват намуд.
Дар баромадҳои Зулфиқор Гулмаҳмадзода, сардори Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Абдуллоҳи Қодирӣ, сухангӯи Маркази исломшиносии назди Президенти Ҷумҳурии Тоҷикистон баландтарин андешаҳою эҳсоси ватандӯстона, хирадмандӣ, ҳушёрию зиракии сиёсӣ, пешгирӣ кардани шомилшавии ҷавонон ба ҳизбу ҳаракатҳои иртиҷоӣ, терроризму экстремизм, ва дигар зуҳуротӣ даҳшатзо баланд садо дода, барои сарбозону афсарони дар ноҳия буда, ки ҳаёти осоишта ва меҳнатӣ бунёдкоронаи мардум бевосита ба заҳматҳои шабонарӯзии онҳо вобастагӣ дорад, боз ҳам ҷасурию диловарӣ, далерию шуҷоат таманно намуданд.
Дар фарҷоми мулоқот туҳфаҳои хотиравии аз ҷониби мақомоти маҳаллӣ омодасохта ва ифтихорномаю сипосномаҳо ба сарбозону афсарон дар ҳузури меҳмонон тақдим карда шуд. Ҷамъомад бо садои суруди миллӣ ба анҷом расид ва барои куллӣ иштирокчиён хеле судманду ҳадафнок арзёбӣ шуд.
П.Нуров
