9 июли соли равон дар толори мақомоти иҷроияи ҳокимияти давлатии ноҳия маҷлиси васеъ баргузор гардид, ки дар он сарварони ноҳия ва муассисаю корхонаҳо, роҳбарони мақомоти ҳифзи ҳуқуқ, раисони ҷамоатҳои шаҳраку деҳот, сарварони муассисаҳои таълимӣ, кумитаҳои маҳалла, имомхатибҳо ва дигар фаъолон иштирок доштанд. Дар ҷаласа инчунин Вазири рушди иқтисод ва савдои ҷумҳурӣ Завқизода Завқӣ Амин низ ширкат варзиданд.
Муовини якуми раиси ноҳия Ҳ. Нидозода аз рӯи масъалаи «Натиҷаҳои рушди иҷтимоию иқтисодии ноҳияи Панҷ дар нимсолаи якуми соли 2024» гузориши муфассал дод. Дар гузориш қайд гардид, ки ҷаласаи имрӯза дар даврае доир гардид, ки аз 4 то 6 июли равон сафари давлатии Раиси Ҷумҳурии мардумии Чин муҳтарам Си Ҷинпин ба ҷумҳурии мо баргузор шуд. Дар ин сафар чандин иншоотҳои калони давлатӣ, аз ҷумла бинои нави Ҳукумати Ҷумҳурии Тоҷикистон ва Парлумони Тоҷикистон, ки аз тарафи ин давлаи ба мо бародару дӯст қомат афрохтаанд, аз ҷониби роҳбарони ҳар ду давлат ба истифода дода шуданд. Дар ин сафар байни Тоҷикистону Чин чандин санаду созишномаҳо, ки ҷиҳати рушду пешрафти соҳаҳои мухталиф мусоидат менамоянд, ба имзо расонида шудаанд.
Баъдан Ҳ.Нидозода қайд намуд, ки бо вуҷуди вазъи номусоиду ноҳамворӣ ҷаҳони муоссир сокинони меҳнатдӯсти ноҳия чун дигар меҳнаткашони кишвар баҳри амалӣ намудани сиёсати созандаю хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар нимсолаи аввали 2024 корҳои назаррасро ба анҷом расониданд. Ҳаҷми истеҳсоли маҳсулоти кишоварзӣ дар ин давра 644, 8 млн сомонӣ, маҷмуи истеҳсоли маҳсулоти саноатӣ 54 млн 566,2 ҳазор сомонӣ, гардиши мол дар тамоми соҳаҳои савдо 144,4 млн сомонӣ расонида шуд.
Рафти иҷрои «Барномаи рушди иҷтимоию иқтисодии ноҳия барои солҳои 2021-2025», ки 146 лоиҳаро дарбар гирифта, 317,7 млн сомониро ташкил медиҳад, ба ҳолати 1 июли соли 2024, 81 лоиҳа бо маблағи 110,2 млн сомонӣ ё 55,5 фоизро (34.7 фоизи азхудкунии маблағҳо) иҷро гардидааст. Вале рафти иҷрои ин Барнома ҳанӯз қаноаткунанда нест.
Нақшаи иҷрои қисми даромади буҷети ноҳия дар нимсолаи аввал 22 млн 253ҳазор сомониро ташкил медиҳад, ки ба 100,1 фоизи нақша баробар аст. Иҷроиши нақшаи пардохти андози иҷтимоии ғайрибуҷетӣ ба 5 млн 801,1 ҳазор сомонӣ, ё ба 108 фоиз расонида шуд. Дар маҷмуъ буҷети маҳал ба андозаи 101,7 фоиз, ё ин ки 28 млн 54,1 ҳазор сомонӣ иҷро гардид, ки нисбати ҳамин давраи соли гузашта 3 млн 618,3 ҳазор сомонӣ зиёд аст. Нақшаи қисми хароҷоти буҷети ноҳия дар 6 моҳа 99 фоиз иҷро гардид.
Тибқи маълумотҳо дар нимсолаи аввали 2024 аз ҷониби бонкҳои давлатӣ, тиҷоратӣ ва ташкилотҳои хурди қарздиҳӣ барои фаъолияти ҳамаи бахшу соҳаҳои ноҳия ва соҳибкорон 43,8 млн сомонӣ равона карда шуда, аз тарафи муҳоҷирони меҳнатӣ бо тариқи бонкҳои номбаршуда 14,8 млн доллари ИМА интиқол гардид.
Ба ҳолати 1 июли соли 2024 шумораи нафақахӯрон 10572 нафарро ташкил дода, пардохти маблағи нафақаи ҳамаи онҳо ҳамеша таҳти назорат қарор дорад ва ба ҳамаи табақаҳои ниёзманд, аз ҷумла ятимону маъюбон, беморону барҷомондагон ва оилаҳои камбизоат пайваста диққати аввалиндараҷа дода мешавад.
Дар шашмоҳа ба шуъбаи Агентии меҳнат ва шуғли аҳолии ноҳия 480 нафар барои пайдо кардани ҷои корӣ муроҷиат карданд. Аз ин шумора 257 нафар ҳамчун бекор ба қайд гирифта шуд. 118 нафар ба ҷойҳои кории доимӣ, мавсимӣ ва муваққатӣ таъмин карда шуданд. Тибқи ҳисоботи оморӣ ба ҳолати 1 июли соли 2024 7971 нафар шаҳрвандони ноҳия дар хориҷи кишвар қарор доранд.
Дар давраи ҳисоботӣ кишоварзон 20113 тонна картошка, 39505 тонна сабзавот, 16930 тонна полезӣ, 18484 воҳиди хӯрокаи чорво, 4450 тонна меваҷот, 1580 тонна гӯшт, (дар вазъи зинда), 9395 тонна шир, 2,1млн донна тухм ва 122 тонна пашм истеҳсол карданд, ки нисбати ҳамин давраи соли гузашта аз 7 то 50 фоиз зиёд мебошад. Саршумори чорвои калон ба 49166 сар, моли майда 117202 сар, паранда 70370 сар, асп 6080 сар расонида шуд. Кирмакпарварон 11,5 тонна пила истеҳсол намуданд.
Имрӯзҳо зарур аст, ки ба кишти такрорӣ суръати тоза бахшида шавад.
Дар гузориш инчунин дар бораи таъмиру барқарорсозии пойгоҳҳои обкашӣ, шабакаҳои обдиҳӣ, иншоотҳои обтаъминкунӣ, фаъолияти кормандони Агентии беҳдошти замин ва оберии ноҳия, баъзан бемасъулиятии кормандони асотсиатсияҳои истифода-
барандагони об, фаъолияти боғпарварон, мубориза аллайҳи малах, истифодаи самараноки ҳар яке қитъаи замин ва тағйирёбии иқлиму таъсири он, зарари офатҳои табиӣ, рушди бемайлони корхонаҳои саноатӣ, камбудиҳо дар ин самт, истифодаи сарфакоронаи нерӯи барқ, пардохти саривақтии он, таъмиру тармим ва нигоҳдории роҳҳои автомобилгард, корҳои сотмон ва васлкунӣ, иншоотҳои таъиноташон гуногун ба истиқболи 35- солагии Истиқлолияти давлатӣ, ривоҷи корҳои созандагиву бунёдкорӣ ва амсоли инҳо сухан ронда шуд.
Баъдан муовини якуми раис Ҳ.Нидозода дар бораи фаъолияти муассисаҳои соҳаи маориф бурду бохти онҳо, сохтмони биною синфхонаҳои иловагӣ, мушкилоти ҷойдошта дар таълиму тарбияи насли наврас, фаъолияти кормандони соҳаҳои тандурустӣ, фарҳанг, ҷавонон, занон, хизмат дар сафи Қувваҳои Мусаллаҳ, вазъи оилаҳо ва пешгирии вайроншавии онҳо рафти иҷрои қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи озодии виҷдон ва иттиҳодияҳои дин», «Дар бораи танзими анъана ва ҷашну маросим дар Ҷумҳурии Тоҷикистон» ва истиқболи сазовори 35-умин солгарди Истиқлолияти давлатии Ҷумҳурии Тоҷикистон андешарони кард.
Пас аз гузориш Вазири рушди иқтисод ва савдои Ҷумҳурии Тоҷикистон муҳтарам Завқизода Завқӣ Амин дар ҷаласа суханронӣ намуда, бори дигар аз иҷрои дастуру супоришҳои Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон, ки аз Паёмашон ба Маҷлиси Олии Ҷумҳурии Тоҷикистон ва дигар вохӯрию мулоқоташон бо фаъолон, намояндагони ҷомеа, ходимони дин, аҳли маориф ва илм бармеоянд, ёдовар шуданд.
Раиси ноҳия муҳтарам Шоҳиён Зарифхӯҷа Фақер ҷаласаро ҷамъбаст намуда, аз рӯи натиҷаҳои рушди иҷтимоию иқтисодии ноҳия дар нимсолаи аввали соли 2024 ва вазифаҳо дар нимсолаи дуюм қарори дахлдор ба тасвиб расонид.
Н.Фозилҷон, П. Нуров , Ф.Гулова
